Lykilatriði að spila í þægilegum fötum

Krakkarnir hljómsveitinni Bloodgroup hafa í nógu að snúast þessa dagana. Þriðja plata þeirra Tracing Echoes kemur út 4. febrúar og að því tilefni verður hlustunarpartý á hárgreiðslustofunni Sjoppunni í kvöld kl 21. Þar verður mikið stuð og allir velkomnir. Í mars verða tvennir útgáfutónleikar og í apríl heldur sveitin svo í langt tónleikaferðalag um Evrópu. Það vakti athygli lífsins hvað Sunna Margrét, söngkona hljómsveitarinnar er alltaf flott á sviði. Við heyrðum stuttlega í henni og spjölluðum um fataval sem og það sem framundan er.

Hvernig velur þú föt til að klæðast á tónleikum?

Mér finnst lang mikilvægast að vera í einhverju sem mér finnst þægilegt. Ég hreyfi mig mikið á sviðinu og verð að geta gert það hömlulaust. Það er alveg óþolandi þegar það eru t.d. einhverjir hlýrar að detta og ekki hægt að standa í því. Ég er oftast bara í mínum eigin fötum, en hef þó lagt mikið upp úr að vera í íslenski hönnun þegar við spilum á Airwaves. Árið 2010 var ég í fötum frá Kalda og Shadow Creatures og árið 2011 var ég í samfesting frá ÝR. Í fyrra sérhannaði svo Sif Baldursdóttir á mig flík sem var einhverskonar ermalaus slá með hettu. Ég var alveg rosalega ánægð með þetta dress og notaði það aftur þegar við spiluðum í Dans dans dans um daginn.

Nú ert þú eina stelpan í hljómsveitinni. Spá strákarnir eitthvað í þessu?

Já algjörlega. Við værum mjög til í að fara í samstarf með einhverjum töff hönnuði sem gæti hannað á okkur öll. Hallur á reyndar mjög flottan vintage lúðrasveitarjakka sem hann hefur verið að spila í og ég átti svipaðan. Við spiluðum nokkur gigg í þeim en það var hægara sagt en gert að hreyfa sig í þessu. Kom engu að síður mjög vel út en það er algjört lykilatriði í mínum huga að vera í þægilegum fötum sem mér líður vel í, sérstaklega þegar maður spilar svona oft. Þetta er bara alveg eins og þú myndir ekki nenna að vera í vinnunni í óþægilegum skóm.

Segðu okkur aðeins frá því sem framundan er hjá Bloodgroup?

Næstu mánuðir verða þétt skipaðir. Platan okkar er að koma út um allan heim, en við vorum að gera samning við útgáfufyrirtæki í Bandaríkjunum sem heitir Sugarcane Recordings. Einnig vorum við að gera samning við bresk – íslensku umboðsskrifstofuna Projekta. Næstu tónleikar sem við spilum á verða svo Sónar í febrúar sem við erum mjög spennt fyrir. Svo eru það útgáfutónleikarnir sem verða bæði í Reykjavík og á Akureyri. Evróputúrinn í apríl og fullt af tónleikum. Svo hvet ég bara sem flesta til að koma í hlustunarpartýið í Sjoppunni í kvöld, Thule býður upp á veitingar og plötusnúðurinn Benni B-ruff mun halda uppi stuðinu þegar við höfum rennt plötunni nokkrum sinnum í gegn.