Stúlkubarnið fannst í Íslendingahverfi

„Barnið var víst þarna frá því snemma um morguninn þannig að við höfum alveg örugglega hjólað tvisvar framhjá því um morguninn, þegar við skutluðum stelpunum okkar í leikskóla, án þess að taka eftir því,“ segir María Ósk Bender, sem býr með fjölskyldu sinni við Rektorparken Valby-hverfi í Kaupmannahöfn þar sem nýfætt stúlkubarn fannst vafið inn í handklæði í tösku milli tveggja kyrrstæðra bíla á fimmtudagsmorgun.

Telpan, sem er á batavegi, var orðin afar köld þegar hún fannst klukkan hálf ellefu um morguninn. María Ósk segir enda að óvenju kalt hafi verið í veðri þennan morguninn.

Við komuna á sjúkrahús var líkamshiti telpunnar kominn niður í 27 gráður, en hún náði sér fljótt og virðist að öðru leyti vera heilsuhraust að því er þarlendir fjölmiðlar herma.

Íbúar borgarinnar eru slegnir yfir fréttunum, ekki síst íbúar við Rektorparken þar sem fjölmargir Íslendingar búa í námsmannaíbúðum.

María Ósk segir fregnirnar hafa komið flatt upp á hana, enda sé gatan afar friðsæl og barnvæn.

„Það vakti athygli okkar þegar við sáum lögregluþjóna þarna í kring, en við höfum aldrei áður orðið vör við slíkt. Við vorum hins vegar að læra og ekkert búin að fylgjast með fréttum þegar var bankað upp á hjá okkur og lögreglan sagði okkur frá því hvað hafði gerst.“

Hún segir íbúana í götunni nær alla vera barnafjölskyldur „þannig að fólk tengir vel við svona atvik“.

Lögreglan í Kaupmannahöfn hefur lagt mikið upp úr því að upplýsa málið, en hefur lítið orðið ágengt.

DR hefur þó eftir Hans Erik Raben, yfirmanni rannsóknarinnar, að í þessu máli séu tvö fórnarlömb, annars vegar stúlkan sjálf og hins vegar móðirin. Ekki sé ósennilegt að móðirin sé vændiskona frá Rúmeníu. Það byggi lögregla á framburði vitnis sem hafi séð dularfulla rúmenska bíla í hverfinu.

Stúlkan er nú á sjúkrahúsi, en félagsmálayfirvöld í Kaupmannahöfn hafa þegar fundið henni fósturforeldra. Þau munu sjá um hana þar til að annað hvort gerist, að foreldrarnir gefi sig fram eða að stúlkan verði ættleidd.