Kolbeinn stendur Zlatan, Ronaldo og van Persie framar

Kolbeinn Sigþórsson tryggði íslenska landsliðinu 2-1 sigur á Albaníu í fyrrakvöld og um leið komst íslenska liðið upp í annað sætið í riðli sínum í undankeppni HM í Brasilíu 2014. Íslenska landsliðið hefur getað treyst á framherja sinn þegar hann hefur verið heill en Kolbeinn hefur nú skorað 11 mörk í 17 landsleikjum eða 0,65 mörk að meðaltali í leik.

Kolbeinn kemur vel út í samanburði við frægustu framherja Evrópu þegar kemur að því að skora fyrir landsliðið sitt. Fréttablaðið athugaði tölfræði kappa eins og Davids Villa, Zlatans Ibrahimovc, Robins van Persie, Marios Balotelli og Cristianos Ronaldo en enginn þeirra er með betri tölfræði í landsliðsbúningnum.

Þetta er ekki tæmandi listi og allir hafa þessir stjörnuframherjar líka skoraði mun fleiri landsliðsmörk en Kolbeinn enda eldri og reyndari.

Það er reyndar einn framherji í Evrópu sem er með betri tölfræði í landsliðsbúningnum en Kolbeinn. Mexíkómaðurinn Javier Hernández hefur skorað 35 mörk í 53 landsleikjum eða 0,66 mörk í leik. Menn eins og Lionel Messi, Neymar eða Luis Suárez ná hins vegar ekki að slá íslenska landsliðsframherjanum við.

Það er bara Ríkharður Jónsson sem hefur verið fljótari í tíu mörkin en Kolbeinn. Kolbeinn var fjórtán leikjum á undan Eiði Smára Guðjohnsen, sem er markahæsti leikmaður íslenska landsliðsins með 24 mörk. Ríkharður skoraði 17 landsliðsmörk og átti metið í 59 ár.

Kolbeinn hefur misst af mörgum landsleikjum vegna meiðsla og það hefur verið helsti óvissuþátturinn. Það hefur hins vegar alltaf verið hægt að treysta á að hann skoraði fyrir landsliðið þegar hann er leikfær.

Hér að neðan má sjá tölfræði helstu stjörnuframherja Evrópu með landsliðum sínum.