Heiða ráðin til þingflokksins

Þingflokkur Bjartrar framtíðar ákvað á mánudag að ráða Heiðu Kristínu Helgadóttur, annan tveggja formanna flokksins, sem framkvæmdastjóra þingflokksins. Þessi ákvörðun var svo staðfest á stjórnarfundi Bjartrar framtíðar daginn eftir.

Heiða Kristín skipaði annað sætið á lista Bjartrar framtíðar í Reykjavíkurkjördæmi norður í nýafstöðnum þingkosningum en náði ekki kjöri. Hún segist áfram munu starfa sem annar tveggja formanna flokksins og taka virkan þátt í stefnumótunarvinnu. Hins vegar hafi hún ákveðið að taka þetta starf að sér til að geta unnið náið með þingflokknum þrátt fyrir að eiga ekki sæti á þingi. „Gott utanumhald skiptir máli og er vanmetið í pólitík,“ segir Heiða, sem segist hafa miklar skoðanir á því hvernig innra starf flokksins eigi að vera.

„Við erum búin að byggja upp net allt í kringum landið og viljum ekki glutra því niður.“ Heiða verður áfram framkvæmdastjóri Besta flokksins í borginni, að minnsta kosti fyrst um sinn, og gegnir því í raun þremur störfum í einu.