Vinir reka eitt elsta kaffihús borgarinnar

„Við höfum öll unnið á Prikinu í mörg ár. Ég er elstur og búinn að vinna þarna síðan 2007, Þura er 22 ára og Geoff er 23 ára. Finni [Guðfinnur Sölvi Karlsson], eigandi staðarins, bað okkur að sjá um reksturinn og reyna að gera staðinn enn betri,“ segir Sveinn Rúnar Einarsson.

Hann sér um rekstur Priksins, sem er eitt af elstu kaffihúsum borgarinnar, ásamt Þuru Stínu Kristlaugsdóttur og Geoffrey Þór Huntington-Williams.

Þremenningarnir hafa séð um rekstur staðarins frá því í desember og kveðst Sveinn Rúnar hlakka mikið til sumarsins enda verði þá ýmislegt skemmtilegt á dagskrá, þar á meðal Mánudagsklúbburinn, teiknikvöld og körfuboltamót. Einnig verður ráðist í endurbætur á portinu við hlið staðarins.

Sveinn Rúnar, Þura Stína og Geoffrey standa enn vaktina á Prikinu og sjá til þess að allt fari vel fram. Stór hópur fastakúnna sækir staðinn reglulega og að sögn Sveins Rúnars ríkir mikil vinátta milli þeirra og starfsfólksins. „Prikið er mikill fastakúnnastaður en það er aldrei neitt vesen á þeim, þeir hjálpa okkur við vinnuna ef eitthvað er.“

Hann segir þremenningana ætla að sinna rekstri staðarins áfram um sinn enda sé starfið skemmtilegt. „Þetta er mjög skemmtilegt og lifandi starf,“ segir hann að lokum.