Eyðileg framtíðarsýn

Stórmyndin Oblivion verður frumsýnd hér á landi annað kvöld. Myndin gerist í óskilgreindri framtíð og er jörðin rústir einar eftir árás geimvera á plánetuna. Sextíu árum eftir stríðið er mannfólkið í óða önn að undirbúa brottför sína með því að safna saman þeim náttúruauðlindum sem eftir eru á jörðinni og eyða innrásarherjum sem urðu innlyksa á plánetunni eftir stríðslok. Jack Harper er fyrrverandi hermaður sem gerir við vélmenni og könnunarloftför sem sinna eftirlitsstörfum á mannlausri jörðinni. Dag einn bjargar hann ungri konu úr geimfari sem hrapar til jarðar og skömmu eftir komu hennar er Jack rænt af hópi uppreisnarmanna sem starfar undir stjórn hins dularfulla Malcolms Beech. Í kjölfarið neyðist Jack til þess að endurmeta allt sem hann áður taldi sig vita um innrásina og eftirmál hennar.

Tom Cruise fer með hlutverk Jacks Harper og líkt og kunnugt er dvaldi hann hér á landi við tökur á myndinni. Úkraínska leikkonan Olga Kurylenko fer með hlutverk hinnar dularfullu Juliu Rusakovu sem Jack finnur í hröpuðu geimfari. Með önnur hlutverk fara stórleikarinn Morgan Freeman, Andrea Riseborough, hinn danski Nikolaj Coster-Waldau og Zoë Bell.

Leikstjóri myndarinnar er Joseph Kosinski, sem leikstýrði áður myndinni Tron: Legacy frá árinu 2010. Handrit myndarinnar er byggt á teiknimyndasögu sem Kosinski samdi árið 2005, skömmu eftir að hann flutti til Los Angeles. Walt Disney keypti réttinn að myndinni árið 2010 en hætti við þau áform þegar í ljós koma að ómögulegt yrði að gera fjölskylduvæna mynd úr handritinu. Universal Pictures tók við keflinu og réð Kosinski til þess að skrifa handritið að myndinni og leikstýra henni.

Frumsýning Oblivion verður víðast hvar ekki fyrr en í næstu viku og því er lítið um gagnrýni enn sem komið er. Peter Bradshaw, gagnrýnandi The Guardian, gefur Oblivion þó tvær stjörnur og segir myndatökuna einkennast af nærmyndum af þaulæfðum hasarhetjusvip Tom Cruise.