Harðari nagli en Leonidas

Gerard Butler segir að leyniþjónustumaðurinn Mike Banning sem hann leikur í Olympus Has Fallen sé harðari nagli en Leonidas sem hann lék í myndinni 300. Hinn 43 ára Butler er þekktur fyrir hlutverk sitt sem konungur Spartverja sem barðist við persneska herinn í myndinni 300 sem kom út 2006. Í Olympus Has Fallen þarf Banning að bjarga forseta Bandaríkjanna undan kóreskum skæruliðum. „Það eru fleiri bardagaatriði í þessari mynd en 300. Þessi náungi er grimmur og myndin gerist í miklu nútímalegra og raunsærra umhverfi,“ sagði Butler um muninn á myndunum tveimur.