Jón Gnarr er ekki bara grínið uppmálað

„Það kom mér mest á óvart hvað hann var alvarlegur. Ég hafði búist við að hann myndi segja brandara í öðru hverju orði en svo var ekki," segir Bettina Enriquez um fund sinn með borgarstjóra Reykjavíkur, Jóni Gnarr.

Bettina vann hádegisverðinn í leik Jóns á Facebook-síðu sinni nú í janúar. Hittingurinn átti sér stað sunnudaginn 24. mars þegar Bettina var stödd hér á landi með vinkonu sinni, en hún er búsett í New York. Hún hefur lengi verið mikill aðdáandi borgarstjórans og aðdáun hennar jókst bara við það að hitta hann og ræða um heimsmálin. „Hann hefur mikla ástríðu fyrir því að breyta heiminum til hins betra og með mun sterkari skoðanir á mikilvægum málefnum en ég hafði búist við. Hann er ekki bara grínið uppmálað," segir hún.

Það var vel tekið á móti Bettinu og vinkonu hennar, Isabellu Sarmiento, í Ráðhúsinu þegar þær mættu á fund borgarstjóra. Jóhanna Jóhannsdóttir, eiginkona Jóns, mætti á svæðið og gaf vinkonunum íslenskt páskaegg sem vakti mikla lukku. Þá fór Jón með þær í skoðunartúr um húsið sem Bettina hefur orð á að sé rosalega nýtískulegt og glæsilegt, áður en sest var til borðs og hópurinn gæddi sér á glæsilegri þriggja rétta máltíð. Á eftir var þeim svo boðið með borgarstjóranum og fylgdarliði hans á Kjarvalsstaði þar sem hann flutti ávarp við opnun fjörutíu ára afmælissýningar safnsins.

„Það voru allir svo elskulegir og yndislegir. Ég kom með miklar væntingar á þennan fund og hann stóð algjörlega undir þeim og rúmlega það, eins og reyndar Íslandsferðin öll," segir Bettina sem kolféll fyrir landi og þjóð í fjögurra daga langri heimsókninni. „Ég get ekki beðið eftir að koma aftur," segir hún spennt. tinnaros@frettabladid.is