Rúmur helmingur þjóða syngur á móðurmálinu í Eurovision

Eins og flestir eru líklegast með á hreinu verður íslenska framlagið í Eurovision í ár flutt á íslensku í fyrsta skipti í sextán ár, eða frá því reglunum var breytt árið 1999.

Árið 1999 var ákveðið að allir mættu syngja á þeirri tungu sem þeir helst kysu og hefur enskan verið vinsæl síðan.

Nú í ár hafa þó 51,3% flytjenda kosið að syngja á sínu móðurmáli, en frá því að breytingarnar voru gerðar hafa aldrei jafn margir valið að syngja á eigin tungu.

Meðal þeirra sem fara þessa leið í ár, auk Íslendinga, eru Eistar, Ítalir, Króatar, Moldóvar, Serbar og Ungverjar. 

Eyþór Ingi er níundi á svið í seinna undankeppniskvöld Eurovision þann 16. maí. Alls taka 17 þjóðir þátt í keppninni það kvöld. Fyrri undankeppnin fer fram 14. maí og þá taka 16 þjóðir þátt. Úrslitakvöldið er 18. maí.

Hér fyrir neðan má horfa á myndbönd allra laga sem keppa á móti Íslandi 16. maí.