Er meðlimur í hlaupagengi frá Lundúnum

"Ég bjó í London í sjö ár og lærði textílhönnun við Central Saint Martins-skólann. Ég átti engan pening fyrir leikfimi og byrjaði því að hlaupa ein um garðinn í hverfinu mínu. Þáverandi kærasti minn fékk vinnu í byggingu sem kallast 1948, en þar safnast hópurinn saman fyrir hlaup, og hann sagði mér frá hópnum. Fyrst var ég feimin við að mæta en lét svo verða af því og hef ekki hætt að hlaupa síðan. Í gegnum hópinn hef ég líka kynnst mörgum af mínum bestu vinum,“ útskýrir Petra Bender textílhönnuður, sem er meðlimur í skokkgenginu Run Dem Crew. Gengið er styrkt af Nike-íþróttamerkinu og var stofnsett í Lundúnum árið 2008 af plötusnúðnum, kennaranum og ljóðskáldinu Charlie Dark en sjá má viðtal við hann og fleiri úr genginu hér fyrir ofan.

Hópurinn er byggður á bandarískri fyrirmynd og má finna sams konar hópa í Berlín, Kaupmannahöfn, Amsterdam og New York. Petra lýsir skokkgenginu sem samfélagi fólks úr öllum kimum samfélagsins sem hittist vikulega og hleypur saman. Kjörorð hópsins eru "It's not a running crew, it's a family" sem þýðist á íslensku "Þetta er ekki hlaupahópur, þetta er fjölskylda“.

Meðlimir Run Dem Crew eru í dag um 150 talsins en þegar Petra gekk til liðs við hópinn taldi hann um sextíu meðlimi. Petra kveðst fá meira úr því að hlaupa í slagtogi við aðra en þegar hún hljóp ein síns liðs. "Eftir að ég gekk til liðs við hópinn fór ég að hlaupa lengra en ég hélt ég gæti og nú hef ég hlaupið um sex hálfmaraþon,“ segir hún og bætir við að hún stefni á sitt fyrsta heilmaraþon í nánustu framtíð.

Petra flutti nýverið aftur til Íslands og hefur nú sett á laggirnar hlaupahóp sem fékk til bráðabirgða nafnið Hipster-hlaupahópur. "Við ætlum að hittast við Hallgrímskirkju vikulega og hlaupa um miðborg Reykjavíkur. Við endum svo hlaupið á barnum. Fólk þarf ekki að vera hipster til að taka þátt, einu skilyrðin er að hafa gaman af því að vera með öðru fólki og gera eitthvað nýtt,“ segir Petra að lokum.