Undirbjuggu óánægju

Tilnefningar til Edduverðlaunanna í ár voru tilkynntar á blaðamannafundi í Bíó Paradís í hádeginu í gær.

Meðal þeirra sem mættu á svæðið voru umsjónarmenn Hraðfrétta á RÚV, þeir Benedikt Valsson og Fannar Sveinsson.

Þeir höfðu með sér upptökugræjur og voru þess albúnir að lýsa kröftuglega yfir óánægju sinni með að hafa ekki hlotið tilnefningu fyrir skemmtiþátt ársins.

Svo fór þó að félagarnir fengu tilnefningu í téðum flokki og geta því unað sáttir við sitt, en þáttur þeirra etur kappi við Andraland, Dans Dans Dans 2, Spurningabombuna og lokaseríuna af Steindanum okkar.