Maður í manns stað

Spéfuglinn Ari Eldjárn getur ekki verið með félögum sínum í uppistandshópnum Mið-Íslandi í Þjóðleikhúskjallaranum um helgina. Hann heldur nefnilega í víking til Svíþjóðar, þar sem hann hefur verið fenginn til að hita upp fyrir vinsælasta grínistann þar í landi, Johan Glans, á nokkrum risasýningum í Lundi og Stokkhólmi.

Ari missir fyrir vikið af heilum fimm sýningum með Mið-Íslandi í Þjóðleikhúskjallaranum frá fimmtudegi og fram á laugardag. Gestir á sýningunum þurfa samt ekki að örvænta því að Fóstbróðirinn Þorsteinn Guðmundsson leysir hann af þessa helgina. -kg, sh