Mjög góður andi á Íslandi

Kvikmyndatökumaðurinn Christoph "Cico" Nicoalisen, sem tók upp Óskarsverðlaunastuttmyndina Toyland, hafði gaman af vinnu sinni við Falskan fugl sem hófst síðasta vor. Myndin verður frumsýnd 22. febrúar.

"Það var mjög áhugavert því aðstæðurnar voru þannig að við höfðum úr nánast engu fjármagni að moða. En ég var mjög ánægður með andann á vinnustaðnum og hjá öllum þeim sem komu nálægt þessu verkefni," segir Nicolaisen, sem er staddur hér á landi í nokkra daga. "Mér finnst svona verkefni að sumu leyti skemmtilegri en dýrari myndir. Allir lögðu hjarta sitt og sál í verkefnið og þess vegna var þetta mjög gaman."

Hann kynntist leikstjóranum Þór Ómari Jónssyni í Suður-Afríku þegar þeir störfuðu saman við gerð þýskrar lottóauglýsingar. "Við urðum vinir og héldum sambandi. Hann hefur gaukað að mér hugmyndum og loksins gekk samstarfið upp með Falskan fugl. Hann er líka með þá hugmynd í kollinum að taka upp Beðið eftir Godot en það yrði að sumri til þegar hægt yrði að mynda allan sólahringinn."

Nicolaisen, sem er frá Þýskalandi en á hálfdanskan föður, hefur mikla trú á Fölskum fugli. "Mér finnst handritið frábært. Það er grimmd í því en við gátum ekki sýnt hana almennilega án þess að vera með mikinn pening. Við ákváðum í staðinn að skilja eitthvað eftir fyrir ímyndunarafl áhorfenda og það var mjög góð aðferð," segir hann.