Eftir höfðinu dansa limirnir

Eftir mörg ár af lélegum úrslitum og enn leiðinlegri fótbolta er aftur orðið gaman að fylgjast með íslenska karlalandsliðinu. Það er farið að spila almennilegan fótbolta og er þess utan að ná góðum úrslitum. Landinn virtist að mestu orðinn þreyttur á liðinu en viðhorfsbreytingin sést kannski best í því að nánast er uppselt, er þetta er ritað, á landsleik gegn Kýpur mánuði fyrir leik.

Ísland náði frábærum úrslitum í síðustu tveimur leikjum sínum og hefur örlögin í sínum höndum. Umspil um laust sæti á HM er raunverulegur möguleiki.

Ísland er komið í 54. sæti FIFA-listans og stefnir enn hærra. Að fikra sig upp þennan lista skiptir gríðarlega miklu máli því eftir honum er farið er raðað er niður í styrkleikaflokka fyrir stórmót. Síðustu stökk munu gera það að verkum að Ísland færist upp um styrkleikaflokk fyrir næsta stórmót, sem er EM. Á það mót stefna allir leynt og ljóst enda verður þátttökuþjóðum fjölgað á næsta móti.

Styrkleikalisti FIFA er stigalisti sem tekur mið af úrslitum landsliðs síðustu fjögur ár. Nýjustu úrslit vega þó meira en gömlu.

Þar sem Lars tók við í janúar árið 2012 verður staða Íslands eingöngu undir hans stjórn ekki ljós fyrr en í janúar árið 2016.

Slæmt gengi liðsins undir stjórn Ólafs Jóhannessonar gerði það að verkum að liðið féll alla leið niður í 131. sæti fljótlega eftir að Svíinn tók við. Síðan hefur leiðin legið upp á við og ef að líkum lætur á landslið Lagerbäck eftir að ógna meti landsliðs Ásgeirs Elíassonar, sem fór upp í 37. sæti listans.

Landsliðið var á árum áður gagnrýnt fyrir margt, þar á meðal áhugaleysi, agaleysi og lélegan undirbúning.

Þó svo að leikmennirnir sem við eigum í dag séu betri en oft áður er ekki sjálfgefið að liðið nái þeim árangri sem það er að ná núna. Til þess að slíkur árangur náist þarf margt annað en geta leikmanna að vera í lagi.

Stjórnunin er þar líklega efst á blaði því eftir höfðinu dansa limirnir. Lagerbäck predikaði strax í upphafi að agi væri forsenda árangurs. Þar hefur hann tekið til eins og á öðrum sviðum.

Ummæli leikmanna um þann mun sem er á umgjörð og undirbúningi er líklega besti vitnisburðurinn um þau framfaraskref sem hafa verið tekin hjá landsliðinu. Skref sem voru löngu tímabær og hefði mátt taka fyrr.

Þetta lið er enn ungt að aldri og er aðeins að taka fyrstu skrefin í rétta átt. Með sama áframhaldi verður þetta lið komið á stórmót áður en langt um líður.