Atli í efsta sætinu

Hasarmyndin Hans & Gretel: Witch Hunters, sem er lauslega byggð á ævintýrinu um Hans og Grétu, er tekjuhæsta myndin í Norður-Ameríku um þessar mundir. Það er kannski ekki í frásögur færandi nema að íslenska Hollywood-tónskáldið Atli Örvarsson samdi tónlistina í myndinni.

Hans & Gretel er fyrsta myndin sem Atli hefur samið tónlistina við sem kemst í efsta sæti aðsóknarlistans vestanhafs og getur hann því vel við unað. Næsta stóra verkefni hans er spennumyndin A Single Shot sem verður frumsýnd síðar á þessu ári.

Með aðalhlutverkin fara Sam Rockwell, William H. Macy og Melissa Leo.