Ásgeir hitar upp fyrir Monsters

Ásgeir Trausti hitar upp fyrir Of Monsters and Men á tónleikaferð hljómsveitarinnar um Evrópu í sumar. Um er að ræða níu tónleika í París, Bretlandi, Danmörku, Þýskalandi og Belgíu. Ásgeir verður meira og minna á ferð og flugi um Evrópu í sumar.

Auk þess að hita upp fyrir Of Monsters and Men kemur hann fram á hátíðunum Hróarskeldu og Wonderfestiwall í Danmörku, Pohoda í Slóvakíu, G! Festival í Færeyjum og Haldern Pop Festival í Þýskalandi. Hér heima fá gestir Bræðslunnar, Keflavík Music Festival og Þjóðhátíðar í Eyjum að njóta tóna þessa unga tónlistarmanns. Ásgeir Trausti er núna staddur á tónleikaferðalagi um Bretland þar sem hann hitar upp fyrir John Grant á tíu tónleikum. Í gær spiluðu þeir í Manchester og í kvöld verða þeir á tónleikastaðnum Shepherds Bush Empire í London.

Ásgeiri hefur verið vel tekið í Bretlandi og fengið góða dóma hjá þarlendum vefmiðlum. Platan Dýrð í dauðaþögn kemur út á ensku í haust erlendis. Tónleikaferð verður farin til að fylgja henni eftir og hafa þrennir tónleikar í Danmörku verið staðfestir í október.