Haim líkleg til að slá í gegn 2013

Systratríóið Haim frá Kaliforníu, sem hefur verið líkt við hljómsveitina Fleetwood Mac, varð efst í vali BBC á þeim flytjanda sem er líklegastur til að slá í gegn árið 2013. Alls tóku 213 gagnrýnendur og fleira fólk úr breska tónlistarbransanum þátt í valinu.

„Haim hefur mikla ástríðu fyrir tónlist og það skín í gegn í lögunum,“ sagði Huw Stephens, útvarpsmaður á BBC. „Þær eru frábærir tónlistarmenn sem kunna að semja melódíur.“

Systurnar hafa þegar hitað upp fyrir bresku böndin Florence and the Machine og Mumford and Sons. Þær Este, Danielle og Alana Haim eru á aldrinum 21 til 26 ára og hafa spilað tónlist frá unga aldri. Tónlist þeirra er blanda af rokki sjöunda áratugarins, eitís- og R&B-tónlist.

Á meðal fyrri sigurvegara í kosningunni eru Adele, Mika, Keane og 50 Cent. Í fyrra bar Michael Kiwanuka sigur úr býtum. Í öðru sæti varð Frank Ocean, sem átti að margra mati bestu plötu síðasta árs, Channel Orange.