Jóhann Berg skoraði í sigri AZ

Jóhann Berg Guðmundsson skoraði seinna mark AZ Alkmaar þegar liðið vann 2-0 sigur á ADO Den Haag og komst í efsta sætið í hollensku úrvalsdeildinni í fótbolta.

Jóhann Berg og Aron Jóhannsson voru báðir í byrjunarliði AZ Alkmaar og spiluðu allan leikinn en liðið vann þarna sinn þriðja leik í röð í deildinni.

Nemanja Gudelj skoraði fyrra mark AZ á 42. mínútu og Jóhann Berg skoraði markið sitt á 65. mínútu.

Jóhann Berg hefur nú skorað sjö mörk á leiktíðinni en þetta var þó bara annað mark hans í deildinni.

AZ Alkmaar er nú með 22 stig á toppnum eða einu stigi meira en Vitesse og tveimur stigum meira en Twente. PSV og Ajax eru núna þremur stigum á eftir AZ.