Sagði nauðgunarbúðir hafa verið nauðsyn

Borgarstjóri japönsku borgarinnar Osaka, hinn þjóðernissinnaði formaður Japanska umbótaflokksins Toru Hashimoto, segist standa við þá skoðun sína að nauðsynlegt hafi verið fyrir hermenn landsins að halda þúsundum kvenna í kynlífsánauð í síðari heimsstyrjöld. Slíkt hafi verið nauðsynlegt til að viðhalda aga og veita þeim slökun.

Hann segir að hins vegar hefði hann átt að taka tillit til þess hvernig skoðunum hans yrði tekið á alþjóðlegum vettvangi. Fórnarlömb kynferðisglæpa japanskra hermanna voru aðallega frá Kóreu og Kína og er talið að ekki færri en 200.000 konum hafi verið haldið nauðugum sem kynlífsþrælum.

Þarlend stjórnvöld hafa fordæmt yfirlýsingar Hashimotos en hann segir á móti að kynlífsþrælkun hafi verið viðtekin venja herja í síðari heimsstyrjöld og ósanngjarnt að heimfæra kerfisbundna kynferðisglæpi eingöngu upp á japanska herinn.

Upphaf deilunnar á rætur að rekja til þess að Hashimoto gaf það í skyn við foringja bandaríska hersins í Japan, sem í eru um 50.000 hermenn, að þeir ættu að nýta sér þjónustu vændiskvenna í meiri mæli. Það taldi hann að myndi fækka afbrotum bandarískra hermanna í landinu, sem hafa verið tilefni andúðar eyjarskeggja.