Stallone og Schwarzenegger malaðir í miðasölunni

Kvikmyndin Bullet to the Head, með vöðvatröllinu Sylvester Stallone í aðalhlutverki, halaði ekki inn nema 4.5 milljónir Bandaríkjadala um helgina í kvikmyndahúsum vestra.

Þá á að sjálfsögðu eftir að taka sunnudagskvöld með í reikninginn, en mikið þarf að ganga á til að gengi myndarinnar teljist annað en afleitt, því myndin kostaði 55 milljónir í framleiðslu.

Hún er ekki nema sjötta mest sótta mynd helgarinnar, og eru það meðal annars systkinin Hans og Gréta sem eru að mala hinn ítalska fola.

Svipaða sögu er að segja af vini hans, Arnold Schwarzenegger, en hann sneri aftur á hvíta tjaldið um þarsíðustu helgi með myndinni The Last Stand. Þar á bæ komu ekki nema 6.3 milljónir í kassann um frumsýningarhelgina, og enn er langt í land ef myndin á að ná upp í 45 milljón dollara framleiðslukostnað sinn.

Þetta er sérkennilegt í ljósi þess að hér eru á ferðinni tveir af gullkálfum Hollywood níunda og tíunda áratugarins, en auðvitað er til í dæminu að búntin tvö séu einfaldlega orðin of gömul til þess að höfða til þess aldurshóps sem stundar kvikmyndahúsin af sem mestum móð. Þeirra gamli aðdáendahópur er á miðjum aldri í dag og heimakærari en áður.

Myndirnar tvær hafa fengið sæmilega dóma gagnrýnenda, Schwarzenegger-myndin þó heldur betri en mynd Stallone. Það er þó ekki öll von úti enn, og líkur á að hér hafi tilviljun ein valdið því að myndir þeirra beggja floppuðu nánast samtímis.

Ekki er nema hálft ár síðan kvikmyndin The Expendables 2 malaði gull og þrefaldaði framleiðslukostnað sinn, en báðir leikararnir komu fram í þeirri mynd. Þar nutu þeir liðsinnis yngri leikara og má vera að það hafi haft sitthvað að segja.

Það er óskandi að þessir hraustu harðjaxlar nái sér aftur á strik því þeir eru ekki nema hálfsjötugir og gætu því átt nóg eftir.