Var með lögguna í símanum á meðan þjófarnir börðu hann

Brynjar Dagbjartsson trésmiður, sem varð fyrir fólskulegri árás tveggja lettneskra ríkisborgara þegar þeir voru að brjótast inn í sumarbústað við Reykjaskóg í Bláskógabyggð í fyrrakvöld, segir skelfilega lífsreynslu að lenda í slíkum ofbeldismönnum. Sauma þurfti þrettán spor í andlit Brynjars, auk þess sem hann er rifbeinsbrotinn og skaddaður á öðru lunga.

Mennirnir tveir voru voru leiddir fyrir dómara á Selfossi í gærkvöldi þar sem gerð var krafa um síbrotagæslu. Til rannsóknar er meiri háttar líkamsárás og innbrot í sjö sumarbústaði í Bláskógabyggð núna í nóvember. Í öllum innbrotunum var flatskjám stolið ásamt ýmiss konar rafmagnstækjum og öðrum munum.

Gefin hefur verið út ákæra á annan manninn vegna á annan tug auðgunarbrota sem hann er sakaður um að hafa framið síðastliðið sumar og í haust. Það er mat lögreglu að brýnt sé að taka manninn úr umferð til að stöðva brotaferil hans.

Brynjar, sem er umsjónarmaður nokkurra bústaða í Reykjaskógi, fór að kanna með bústaðinn fyrst það var ljós í honum með Gunnari Ingvarssyni, bónda á Efri Reykjum.

Brynjar beið í bílnum sínum á meðan Gunnar fór heim að sækja lykil að hliðinu að bústaðahverfinu.

„Á meðan koma þeir niðureftir og ég sit bara í bílnum mínum og spyr þá hvaða leið þeir séu á. Þeir segjast bara vera að skoða og ég spurði þá bara hvort þeir vildu ekki hinkra, því lögreglan væri að koma. Þá reif annar þeirra bara upp hurðina hjá mér og byrjaði að sparka og slá mig þarna undir stýri á bílnum,“ segir Brynjar. „En ég var í símasambandi við lögregluna þegar allt þetta skeður og þeir heyrðu allt sem gerðist þarna á meðan þeir voru að berja á mér.“

Brynjar fór strax til læknis. „Ég er með þrettán spor í andliti og ég er brákaður á rifbeini, og mér skildist á honum Gylfa lækni, að ég væri með mar á lunganu.

En hvernig er að lenda í svona uppákomu?

„Þetta er skelfilegt alveg, en maður lifir þetta af.“