Hreyfingin hefur verið lögð niður

Samróma var ákveðið á landsfundi Hreyfingarinnar, þann 16. Nóvember síðastliðinn, að hún yrði lögð niður í samræmi við 1. grein í kaflanum um félagsslit í samþykktum Hreyfingarinnar. Þar segir: „Þegar markmiðum Hreyfingarinnar er náð eða augljóst er að þeim verði ekki náð mun Hreyfingin hætta starfsemi og hún lögð niður.“

Þetta kemur fram í fréttatilkynningu frá Hreyfingunni sem Þór Saari fyrrverandi Þingmaður sendi frá sér. Þar segir einnig að Hreyfingin eigi rætur sínar í Borgarahreyfingunni, sem hafi verið stofnuð sem róttækt umbótaafl í íslenskum stjórnmálum. Að Hreyfingin hafi alltaf starfað í þeim anda. Þannig hafi hún alltaf hafnað styrkfé frá lögaðilum, hafði engan formann og notaðist við samhljóða ákvörðunartöku í starfi sínu.

Fyrir Alþingiskosningarnar á síðasta ári beitti Hreyfingin sér fyrir stofnun Dögunar, en ekki náðist að fá mann inn á þing. Í tilkynningunni segir að sú stjórnarskrá sem samþykkt var í þjóðaratkvæðagreiðslu þann 20. október 2012, sé raunveruleg stjórnarskrá þjóðarinnar og eina leið íslensks samfélags og stjórnmála úr því öngstræti sem Íslands sé fast í.

Fréttatilkynningu Hreyfingarinnar er hægt að sjá hér fyrir neðan:



„Hreyfingin á rætur sínar í Borgarahreyfingunni sem var stofnuð sem róttækt umbótaafl í íslenskum stjórnmálum í aðdraganda kosninganna árið 2009 og starfaði Hreyfingin ætíð í þeim anda. Hreyfingin hafnaði styrktarfé frá lögaðilum, hafði engan formann og notaðist við samhljóða (consensus) ákvörðunartöku í starfi sínu. Hreyfingin tók afstöðu til allra mála á þeirra eigin forsendum og hafnaði gamalgróinni hefð flokksátaka Fjórflokksins.

Í aðdraganda síðustu Alþingiskosninga beitti Hreyfingin sér fyrir stofnun breiðfylkingar gegn ríkjandi stjórnmálaumhverfi og bauð fram undir merkjum Dögunar. Úrslit kosninganna eru öllum kunn og Fjórflokkurinn hefur hér enn öll völd.“

Hreyfingin óskar þjóðinni velfarnaðar með þá framtíðarsýn sem hún valdi sér í kosningunum en er enn þeirrar skoðunar að eina leið íslensks samfélags og stjórnmála úr því öngstræti sem við erum föst í sé með nýju stjórnaskránni sem var samþykkt í þjóðaratkvæðagreiðslu þann 20. október 2012.

Sú stjórnarskrá er raunveruleg stjórnarskrá íslensku þjóðarinnar, stjórnarskrá sem hún hefur sjálf samið og samþykkt. Höfnun Fjórflokksins á Alþingi á lýðræðislegri niðurstöðu þjóðaratkvæðagreiðslunnar er því ekkert annað en hreint og klárt valdarán pólitískrar yfirstéttar í landinu. Hreyfingin þakkar öllu samferðafólki fyrir undanfarin ár og hvetur til áframhaldandi andófs.“