Leggja til að efnt verði til þjóðarátaks um byggingu nýs spítala

Kristján L. Möller, Samfylkingu, Brynjar Níelsson, Sjálfstæðisflokki, og Guðmundur Steingrímsson, Bjartri framtíð, eru fyrstu flutningsmenn tillögu til þingsályktunar um að lokið verði eins fljótt og unnt er undirbúningi að byggingu nýs Landspítala við Hringbraut í Reykjavík. Þetta kemur fram í fréttatilkynningu.

Þingmennirnir leggja til að efnt verði til þjóðarátaks um byggingu nýs spítala og til stuðnings tillögunnar nefna þingmennirnir að aldurssamsetning þjóðarinnar sé að breytast og að talið sé að á árinu 2025 muni hlutdeild sjötugra aukast um allt að 40%. Að óbreyttu muni Landspítalinn engan veginn geta mætt aukinni þjónustuþörf vegna meðalaldurs og að i því samhengi sé bygging 77 herbergja sjúkrahótels á lóð nýs Landspítala þjóðarnauðsyn.

„Verði ekki af endanlegri sameiningu Landspítalans munu miklir fjármunir tapast. Rekstur Landspítala í núverandi mynd er mjög óhagkvæmur vegna þess hve dreifð starfsemin er.“ Alls fer starfsemin fram á 17 stöðum, í um 100 húsum og í tilkynningunni segir að rekstrarlegur ávinningur af endanlegri sameiningu Landspítalans gæti numið um það bil 2,6 milljörðum króna á ári miðað við verðlag 2010. „Það samsvarar um 6,5% af rekstrarkostnaði spítalans árið 2012.“

Í þriðja lagi er nefnt að áætlanir um að byggja nýjan Landspítala nálægt Háskóla Íslands veiti tækifæri til að samnýta frekar þau tæki og þá tækni sem til staðar er. „Nálægðin mun skapa grundvöll til sameinaðs vettvangs fyrir heilbrigðisstarfsfólk sem stundar vísindarannsóknir og þekkingarsköpun. Líklegt er að slíkt umhverfi muni draga að vel menntaða heilbrigðisstarfsmenn.“

Flutningsmenn tillögunnar segja þrjár fjármögnunarleiðir vera mögulegar.

Fyrsta leiðin væri hefðbundin leið fjármögnunar ríkisframkvæmda en það myndi kalla á sársaukafullan niðurskurð á öðrum sviðum til margra ára og ekki væri víst að jákvæð áhrif spítalabyggingarinnar myndu vega upp á móti neikvæðum áhrifum slíks niðurskurðar.

Önnur leið væri að Nýr Landspítali ohf. eða ríkissjóður gætu sjálfir fjármagnað bygginguna með lántöku. „Benda má á að hinn 4. nóvember 2009 undirrituðu fulltrúar tuttugu lífeyrissjóða, og heilbrigðis-, forsætis- og fjármálaráðherrar fyrir hönd ríkisstjórnarinnar, viljayfirlýsingu um að hefja samstarf við undirbúning að fjármögnun og framkvæmdum. Talið er að svo mikil hagræðing verði í rekstri nýs spítala undir sama þaki að þeir fjármunir sem sparast muni standi undir árlegum afborgunum og vöxtum af lánum.“

Þriðja leiðin væri að fjármagna bygginguna með sérstakri tekjuöflun, til dæmis þannig að tiltekinn hluti andvirðis af framtíðarsölu ríkiseigna rynni til byggingarinnar. „Einnig mætti hugsa sér að slík fjárveiting væri notuð til að greiða inn á lán sem tekin yrðu og lækka þar með bæði höfuðstólinn og vaxtagreiðslur.“