Hitzfeld: Noregur og Sviss líklegust í riðlinum

Svissneska karlalandsliðið í knattspyrnu er mætt til Osló. Liðin mætast klukkan 17 í uppgjöri efstu liðanna í riðlinum. Leikurinn verður í beinni útsendingu á Stöð 2 Sport 3 en einnig verður fylgst með gangi mála hér á Vísi.

Ottmar Hitzfeld, landsliðsþjálfari Svisslendinga, segir að hugarfarið hafi orðið sínum mönnum að falli gegn Íslandi. Liðið leiddi 4-1 í síðari hálfleik en Ísland náði að jafna áður en yfir lauk.

„Ég hef engar áhyggjur af því að mínir menn bregðist illa við úrlitunum. Í hvert skipti sem við höfum spilað illa höfum við svarað með góðum leik. Ég hef það sterklega á tilfinningunni að það verði uppi á teningnum núna,“ sagði Hitzfeld á blaðamannafundi í Osló.

Hitzfeld bendir réttilega á að Sviss sé í bílstjórasæti riðilsins enda hafi liðið fjögurra stiga forskot á Norðmenn.

„Við erum líklegastir til að fara áfram ásamt Noregi. Ég tel þó að við munum vinna riðilinn,“ sagði Hitzfeld.

Egil „Drillo“ Olsen, þjálfari Noregs, vildi ekki fara nákvæmlega út í veikleika svissneska liðsins.

„Sviss sýndi tvær hliðar á sér gegn Íslandi. Skipulagið var afar lítið seinni hluta leiksins og þá misstu þeir sjónir á verkefninu,“ segir Drillo. Hann hafi þó séð Sviss leggja Brasilíu að velli á dögunum og þá hafi liðið staðið vaktina í níutíu mínútur.

Aðstoðarmaður Olsen, Ola By Rise, segir að setja megi leikinn í kvöld upp sem leik í fjórðungsúrslitum. Úrslitaleikurinn verði svo gegn Íslendingum í Osló 15. október.