Það helsta um andstæðing Íslands

Albanir eru mættir til Íslands enda stórleikur fyrirhugaður á Laugardalsvelli í kvöld. Ekki skildi reikna með markaveislu.

Albanir hafa skorað sjö mörk og fengið sjö á sig í leikjum sínum sjö í undankeppninni. Edgar Cani, 24 ára framherji Carpi á Ítalíu, er markahæstur með tvö mörk. Cani skoraði einmitt í 2-1 sigri Íslands í fyrri leiknum í Tirana. Aðrir leikmenn liðsins hafa skipt hinum mörkunum fimm á milli sín.

Sterkasti leikmaður Albana og sá landsleikjahæsti er líklega miðvörðurinn Lorik Cana. Miðvörðurinn þrítugi hefur leikið 70 sinnum fyrir þjóð sína og borið fyrirliðabandið undanfarin ár.

Cana, sem í dag leikur með Lazio á Ítalíu, var áður á mála hjá Galatasaray í Tyrklandi, Sunderland á Englandi auk Marseille og PSG í Frakklandi. Arsenal sýndi honum áhuga á táningsaldri en vegabréfsvandamál kom í veg fyrir að hann gæti sótt Lundúnafélagið heim. Cana var fyrsti albanski leikmaðurinn til að spila í ensku úrvalsdeildinni þegar hann samdi við Sunderland.

Sex leikmenn albanska landsliðsins eru á mála hjá ítölskum liðum. Aðeins þrír í leikmannahópnum spila með liðum í heimalandi sínu.

Markahæsti leikmaðurinn í hópnum er Hamdi Salihi, framherji Jiangsu Sainty í Kína. Sá hefur skorað tíu sinnum fyrir þjóð sína en var ekki í byrjunarliðinu í 1-0 tapinu í Slóveníu á föstudag. Hann kom þó inn á snemma í síðari hálfleik.

Albanir hafa aldrei staðið betur í alþjóðlegum fótbolta. Sigrar á Norðmönnum og Slóvenum í undankeppninni lyftu liðinu upp í 37. sæti heimslistans. Í dag sitja þeir í 38. sæti og eiga, líkt og Íslendingar, fínan möguleika á að ná öðru sætinu í riðlinum. Leikurinn í kvöld hefur mikið um það að segja.