Neyðarástandi lýst yfir í Egyptalandi

Forseti Egyptalands hefur lýst yfir neyðarástandi í landinu. Neyðarástandið á að gilda í mánuð.

Tugir ef ekki hundruð manna hafa látið lífið í Kaíró í morgun eftir að öryggissveitir réðust til atlögu gegn mótmælendum.

Minni búðir stuðningsmanna Múhameds Morsís hafa verið rýmdar, en enn geisa hörð átök í hinum búðunum, þar sem fleira fólk hafði hreiðrað um sig.

Hörð átök geisa einnig víðar í borginni og mótmæli eru hafin í fleiri borgum Egyptalands, að minnsta kosti í borgunum Minja, Assiut og Alexandria.

Mótmælendurnir, sem flestir eru liðsmenn Bræðralags múslima, krefjast þess að Morsi fái forsetaembættið á ný. Herinn steypti honum af stóli 3 júlí og hefur síðan haft hann í haldi ásamt mörgum helstu leiðtogum Bræðralags múslima.

Stjórnvöld segja nú að nærri hundrað manns hafi látist í morgun, en Bræðralag múslima talar um fleiri hundruð manns.