Blóðugasti dagur Egyptalands í marga áratugi

Átökin í Egyptalandi í gær urðu þau blóðugustu sem þar hafa þekkst áratugum saman. Mannfallið þennan eina dag var meira en samanlagt í átján daga uppreisn almennings gegn Hosni Múbarak árið 2011.

Heilbrigðisráðuneyti Egyptalands sendi rétt í þessu frá sér tilkynningu um að tala látinna væri  komin upp í 525. Sú tala gæti enn hækkað, því margir eru illa særðir.

Almennt virðast Egyptar hafa virt útgöngubannið, sem sett var á í gærkvöld og stóð þar til snemma í morgun. Ró virðist vera yfir Kaíró og öðrum borgum landsins sem stendur, en mikil spenna í lofti.

Engar sættir eru í sjónmáli milli hersins annars vegar og Bræðralags múslima hins vegar. Bæði herinn og Bræðralagið hafa lengi notið mikils fjöldastuðnings í Egyptalandi, en tortryggnin milli þessara andstæðu hópa virðist orðin algjör.