Láru Hönnu gert að sanna hæfi sitt

Strax eftir að Lára Hanna Einarsdóttir, þýðandi og samfélagsrýnir, var tilnefnd sem varamaður í stjórn RÚV barst henni bréf frá lögmanni menntamálaráðuneytisins þar sem fram kemur að vafi leiki á um hæfi hennar.

Fram hefur komið að á síðustu dögum þingsins víxluðu Píratar fulltrúum sínum í Stjórn RÚV ohf, varamanni og aðalmanni í stjórn. Birgitta telur, án þess að hún hafi sanninir fyrir því, að sú tillaga, að minnihlutinn ætti aðeins að fá þrjá fulltrúa og Píratar þar með engan, megi rekja til þess að Lára Hanna var fulltrúi þeirra. Leynileg atkvæðagreiðsla varð svo til þess að upphaflega hugmyndin varð ofan á og Lára Hanna er því varamaður í stjórn RÚV.

"Ég fékk tölvupóst daginn eftir kosninguna hjá alþingi, á föstudeginum, þar sem lögfræðingur ráðuneytisins hafði verið gert að afla upplýsinga um hæfi mitt, til að taka sæti sem varamaður í stjórn Ríkisútvarpsins. Þetta er út frá sérstöku hæfisskilyrði í lögunum. Og eftir því sem ég kemst næst er enginn annar, hvorki aðalmenn né varamenn, sem þarf að sanna hæfi sitt. Það er ekki verið að skoða aðra."

Láru Hönnu þykir þetta sérkennilegt, að vera ein í þeirri stöðu. "Jájá, það er náttúrlega mjög sérkennilegt. Um er að ræða átján manns og mjög sérkennilegt að ég ein sé tekin út úr. Ekki síst ef litið er til þess hverjir skipa í stjórn og varastjórn." Lára Hanna telur, í ljósi þessa, ekkert óeðlilegt að fleiri en hún verði þá skoðaðir.

Vísað hefur verið til þess að í lögum standi eitthvað á þá leið að þeir sem sitji í stjórninni megi ekki starfa fyrir samkeppnisaðila RÚV. Lára Hanna hefur starfað sem verktaki við þýðingar og hefur þýtt þættina Bold and the Beautiful fyrir Stöð 2. Lára Hanna telur að ýmis atriði önnur geti haft meiri áhrif á hæfi manna til að sitja í stjórn RÚV ef því er að skipta; og þurfi þá ekki endilega að koma til störf fyrir fjölmiðla.