,,Við erum í draumastöðu“

Eyþór Ingi verður númer nítján í röðinni í Söngvakeppni evrópskra sjónvarpsstöðva annað kvöld. Reynir Þór Eggertsson, eurovisionsérfræðingur, segir þetta vera algjöra draumastöðu.  

Ísland er á milli Danmerkur og Azerbeijan í röðinni, en þau lönd eru ofarlega í spám veðbanka og sérfræðinga. „Athygli manna verður á skjánum einmitt þegar Eyþór syngur. Fólk er alltaf spenntast að sjá þau lönd sem spáð er sigri, og þeir sem horfa kannski ekki á alla keppnina eru mjög líklegir til að setjast niður og fylgjast með þessum löndum. Að vera svon a seint og á milli laga sem spáð er sigri eykur líkurnar á að fólk taki eftir okkur“, segir Reynir. Hann segir keppnina snúast um að fanga athygli áhorfandans þar sem um 26 lög er að ræða. „Mið – og Norður Evrópa hlustar eftir danska laginu og Austur Evrópa eftir þessu frá Azerbaijan. Við erum þarna akkúrat í miðjunni.“   

Reynir hafði lýst því yfir að íslenska lagið höfðaði ekki til hans og að hann væri svartsýnn á að það kæmist inn í aðalkeppnina. „Ég hef aldrei verið jafn ánægður með að hafa rangt fyrir mér“, segir hann. Aftur á móti sé ekkert öruggt þegar Eurovision er annars vegar. „Ég er þokkalega bjartsýnn á þetta gangi vel og  hugsa að við lendum í svona 12. sæti.“