Tugmilljóna tjón í Vestmannaeyjum

Tugmilljóna tjón varð á togskipinu Bylgju VE þegar gámaskipið Tetuan sigldi utan í skipið um áttaleytið í morgun. Eyjafréttir greina frá þessu.

Samkvæmt upplýsingum Eyjafrétta sem fengust á skrifstofu Vestmannaeyjahafnar varð skipting í gámaskipinu til þess að gámaskipið fór utan í Bylgju VE. Gámaskipið rakst einnig utan í bryggjubíl en skemmdir á honum voru minnihátar.

„Þetta er mikið tjón á skipinu, tugmilljóna tjón sýnist mér. Skipið er mikið dældað við og fyrir neðan sjólínu. Þilið í lestinni hefur gengið inn og sprungið út á millidekkinu en skemmdirnar ná einnig niður í vélarrýmið," sagði Jóhann Þorvaldsson, yfirvélstjóri á Bylgju VE við Eyjafréttir.

Skipið var bundið við bryggju og átti ekki að halda til veiða fyrr en í lok júní. Málið er komið í hendur tryggingarfélags Bylgju VE.