Alþjóðlegi hamingjudagurinn verður haldinn í fyrsta sinn á morgun.

Dagurinn er haldinn að frumkvæði Sameinuðu þjóðanna og er markmið hans að vekja athygli á hamingju sem mikilvægu takmarki fyrir einstaklinga og stjórnvöld.

Allsherjarþing Sameinuðu þjóðanna viðurkennir hamingju og vellíðan sem sammannlegt grundvallarmarkmið og hvetur aðildarríkin til að leggja enn meiri áherslu á mikilvægi þess að leita að hamingju og vellíðan og að þessi atriði séu höfð til hliðsjónar við ákvarðanir stjórnvalda.

Landlæknisembættið býður fjölmiðlum til stuttrar kynningar á Alþjóðlega hamingjudeginum í leikskólanum Vinagarði í fyrramálið þar sem niðurstöður nýrrar könnunar á hamingju Íslendinga verða kynntar.

Einnig verða kynntar Fimm leiðir að vellíðan, sem embættið hefur gefið út í tilefni dagsins, en þau fela í sér fimm einföld skref fyrir unga sem aldna í átt að meiri hamingju og betri líðan.

„Já ég ætla að heimsækja leikskólabörn í fyrramálið og tala við þau um hamingjuna," segir Katrín Jakobsdóttir mennta- og menningarmálaráðherra, en hún ætlar ásamt Geir Gunnlaugssyni landlækni að flytja ávarp á kynningunni.

„Þetta er dálítið merkilegt. Það er mjög sjaldgæft að hlutir eins og hamingjan séu ræddir svona á pólitískum vettvangi, en það gerðist hjá Sameinuðu þjóðunum og þetta í raun tekið upp sem eitthvað sem eitthvað sem stefna mætti að."

Katrín segist vera hamingjusöm, meira að segja þegar hún er döpur, en hefur enn ekki fundið leyndardóminn á bak við hamingjuna.

„Ég er ekki komin alveg þangað að ég viti það, en ég held það hafi eitthvað að gera með það að njóta hverrar stundar í núinu og sjá það jákvæða við hlutina þó illa gangi. En það er enginn búinn að leysa þetta enn, ekki heimspekingar og ekki ég heldur."