Ég er að svara kalli þjóðarinnar

"Ég henti inn hugleiðingu á Facebookið mitt hvort ég ætti ekki að taka einhvern föstudag og keyra fólk inn í helgina. Sá status sprengdi sér í yfir 1500 Like sem er góð prósenta af þjóðinni. Ég er einfaldlega að svara kalli þjóðarinnar," segir Egill Gillzenegger Einarsson. Á föstudaginn klukkan 20 hefst nýr klukkutíma langur þáttur á FM957 sem heitir Stuðlög Gillsarans. "Ég og Blö höfum verið með dagskrárlið á föstudögum milli klukkan 16 og 18 þar sem ég spila svokallað stuðlag. Þetta eru yfirleitt mjög skemmtileg danslög sem heyrast ekki oft á útvarpsstöðvum. Það er óhætt að segja það að hlustendur hafi tekið vel í þetta. Þrátt fyrir að Blö-Poop hafi gert sitt besta í að eyðileggja þetta þá er þetta orðinn virtasti dagskrárliðurinn í FM95BLÖ í dag," segir Egill. Ef einhverjir ætla að taka slökunarkvöld á föstudaginn þá ræður Egill þeim frá því að hlusta á þáttinn. "Það er ekki fræðilegur möguleiki að hlusta á þennan þátt og henda sér svo í góða slökun. Vegna þáttarins verður þetta stærsta helgin á árinu í 101 Reykjavík. Skemmtistaðaeigendur geta byrjað að þakka mér fyrir þetta núna á Twitter eða Facebook."