Ekki búin að gera nokkurn skapaðan hlut fyrir bóndann

"Ég er svo sofandi að ég áttaði mig ekki almennilega á deginum fyrr en ég hitti Andreu Róberts á förnum vegi eldsnemma í morgun. Við þekkjumst nú ekkert en hún vatt sér upp að mér og óskaði mér til hamingju með bókina og sagðist einmitt hafa gefið hana í bóndadagsgjöf í morgun," segir Ingibjörg Reynisdóttir rithöfundur og leikkona sem skrifaði metsölubókina um lífsgöngu Gísla á Uppsölum.



Ekki búin að gera nokkurn skapaðan hlut

"Ég er ekki búin að gera nokkurn skapaðan hlut fyrir bóndann minn enn sem komið er. Á meira að segja stefnumót við nokkra kollega mína í dinner í kvöld þannig að ekki fær hann rómantískan kvöldverð heldur. En þetta stendur allt til bóta. Það hefur verið hefð hjá mér undanfarin ár að stefna honum á snyrtistofuna sem ég hef unnið á, á þessum degi og nostrað við fæturnar á honum og gert hann voða fínan.

Fær nudd ef heppnin er með honum

"Ef hann hefur verið heppinn hefur hann líka fengið nudd. En þar sem ég var hvorki að vinna á stofunni í dag né almennilega meðvituð um bóndadaginn þá verður það ekki svoleiðis dekur í dag. Nú ætla ég að leggja höfuðið í bleyti og reyna að finna upp á einhverju pínkulítið meira spennandi en bara blómvendi. Hugsa að ég geri bara svipað og Andrea og kaupi bók. Það var ein sem hann langaði í en fékk ekki í jólagjöf. Besta segja ekki meir ef hann skyldi ramba inn á Visi.is áður en hann kemur heim í dag," segir Ingibjörg.