Illmennið Giamatti berst við Köngulóarmanninn

Fregnir herma að bandaríski leikarinn Paul Giamatti verði illmenni næstu kvikmyndar um Köngulóarmanninn.

The Amazing Spider-Man 2 er önnur kvikmyndin í þessari nýju seríu um Lóa, en sú fyrsta var frumsýnd í fyrrasumar og fékk prýðilegar viðtökur.

Giamatti er líklega þekktastur fyrir hlutverk sín í kvikmyndunum Sideways og American Splendor, en þessi margverðlaunaði leikari hefur ekki áður látið til sín taka í ofurhetjukvikmyndum.

Illmennið sem um ræðir er nashyrningsmennið Rhino, en Köngulóarmaðurinn barðist fyrst við hann á síðum myndasögublaða árið 1966.

Það er Marc Webb sem leikstýrir, og þau Andrew Garfield, Emma Stone og Jamie Foxx sem fara með önnur hlutverk.

Kvikmyndin er væntanleg í apríl á næsta ári.