Skotið á mótmælendur, þingið leyst upp

Einn maður er þegar fallinn fyrir byssuskoti frá egypskum sérsveitarhermönnum í Kaíró. Nýi forsetinn hefur leyst upp efri deild þjóðþingsins, sem skipað var að miklu meirihluta stuðningsmönnum forvera hans.

Til átaka kom þegar mótmælendur, stuðningsmenn Múhameds Morsi og Bræðralags múslima, héldu að höfuðstöðvum Lýðveldisvarðanna, sérsveita hersins sem hefur það meginhlutverk að gæta öryggis í höfuðborginni.

Hermennirnir hófu skothríð með þeim afleiðingum að í það minnsta einn maður lét lífið.

Herinn steypti Morsi af stóli á miðvikudagskvöld. Í gær tók svo Adlí Mansúr, dómari við hæstarétt landsins, við forsetaembættinu til bráðabirgða. 

Fjöldi fólks hefur streymt út á götur Kaíró í dag til að mótmæla þessari stjórnarbyltingu og krefjast þess að Morsi taki aftur við.

Morsi situr í stofufangelsi ásamt mörgum helstu leiðtogum Bræðralags múslima.