Hita upp fyrir Eurovision með sínum hætti

„Það er ekki beint hægt að kalla okkur Eruovision-aðdáendur en þetta er eitthvað sem við vorum skikkaðir í,“ segir Hraðfréttamaðurinn Benedikt Valsson, sem ásamt kollega sínum Fannari Sveinssyni verður með upphitunarþátt fyrir Söngvakeppnina sem hefst í lok mánaðarins. Þeir Benedikt og Fannar eru því þessa dagana að kafa ofan í gamla Eurovision-þætti, þar sem þeir einblína á íslensku keppnina í gegnum tíðina. „Þetta verða tuttugu mínútna þættir sem verða ekki með sama sniði og Hraðfréttir en þó með okkar stíl. Stefnan er að hafa þáttinn skemmtilegan, þar sem við stiklum á stóru í gegnum það sem borið hefur á góma í fortíðinni,“ segir Benedikt, en þeir félagarnir gera sér grein fyrir vinsældum söngvakeppninnar hjá þjóðinni. „Þetta er mjög spennandi gluggi þar sem áhorfið er yfirleitt í kringum fimmtíu prósent, svo við hlökkum til.“ Þrátt fyrir að vera ekki miklir Eurovision-aðdáendur sjálfir hafa Benedikt og Fannar komist að ýmsu á flakki sínu um gamlar keppnir. „Það hefur komið okkur einna mest á óvart hversu alvarlega allir taka þetta. Fyrir keppendur er þetta dauðans alvara og maður verður alveg stressaður með þeim að horfa á þetta. Sigga Beinteins er í uppáhaldi hjá mér því hún var partur af mínu uppeldi,“ segir Benedikt á meðan Fannar félagi hans er hrifnastur af söngvaranum Kristjáni Gíslasyni. „Svo er tískan í söngvakeppnunum kafli út af fyrir sig.“ Þættirnir hefjast 25. janúar næstkomandi.