„Hefðbundið stjórnsýsluklúður“

Fulltrúar Sjálfstæðisflokks í íþrótta- og tómstundaráði Reykjavíkur eru ósáttir við að tillaga um skipun samstarfshóps um mál tengd ÍTR skuli hafa komið fram í menningar- og ferðamálaráði og verið send beint þaðan til borgarráðs. Frumkvæðið hafi átt að vera hjá íþrótta- og tómstundaráði.

Tillagan umdeilda lýtur að sundlaugum, ferðamálastefnu, atvinnustefnu og stefnu ÍTR.

„Í ljósi þess sem á undan er gengið kemur því miður ekki á óvart að formaður og aðrir fulltrúar meirihlutans í íþrótta- og tómstundaráði uni slíkum yfirgangi. Sú spurning vaknar hvort um sé að ræða hefðbundið stjórnsýsluklúður af hálfu meirihluta Samfylkingar og Besta flokksins eða hvort þarna komi fram með óvenju skýrum hætti metnaðarleysi meirihlutans í málefnum ÍTR, bókuðu sjálfstæðismenn.

Fulltrúar Samfylkingar og Besta flokksins sögðu að víðtæks samráð verði leitað við þá sem málið er viðkomandi. Þeir sögðust hins vegar „harma innilega“ að tillagan hafi ekki fyrst komið fram í ÍTR heldur Menningar- og ferðamálaráði. „Ástæðan er ekki metnaðarleysi meirihlutans gagnvart málaflokknum heldur hefðbundið stjórnsýsluklúður,“ útskýrðu þeir.

- gar