Tæpur þriðjungur hunda í Reykjavík óskráðir

Talið er að uppundir 30% hunda í Reykjavík séu óskráðir - og það leysir engan vanda að skylda hundaeigendur til að sækja námskeið, segir formaður heilbrigðisnefndar Reykjavíkur. Í nýrri hundasamþykkt borgarinnar er hundum á bannlista fjölgað um níu tegundir.

Eftir að fregnir bárust af sex ára stúlku sem var bitin illa í andlit í jólaboði um hátíðarnar, hafa ýmsir hundaeigendur og framkvæmdastjóri Hundaræktarfélags Íslands lýst þeirri skoðun sinni að skylda ætti hundaeigendur til að sækja námskeið áður en þeir fái leyfi til hundahalds.

Fréttastofa ræddi í morgun við Kristínu Soffíu Jónsdóttur, formann heilbrigðisnefndar Reykjavíkur, sem sagði að ekki stæði til að skylda fólk til að sækja slík námskeið. Nýbúið væri að breyta hundasamþykkt Reykjavíkur, en samþykktin er nú til umsagnar í Umhverfisráðuneytinu. Þar eru gerðar ýmsar breytingar, þær helstar að í stað þess að sex tegundir hunda væru á bannlista - hefði þeim verið fjölgað upp í 15 tegundir. Og einnig ætti að koma upp hundaskrá á netinu.

Kristín bendir á að um 2500 hundar eru skráðir í Reykjavík en bitmálin séu fá. Þá vill hún árétta að hundar gegni víða mikilvægu og jákvæðu hlutverki í samfélaginu, m.a. blindra- og leitarhundar.