Íbúar hafa fengið 100 tonn af salti

Stöðugur straumur íbúa hefur verið á hverfastöðvarnar í dag að ná í sand og salt til að bera á einkalóðir og innkeyrslur. Starfsmenn stöðvanna hafa þegar afgreitt yfir 100 tonn af salti og sandi til íbúa síðustu daga, samkvæmt upplýsingum frá Reykjavíkurborg. Á morgun geta íbúar komið á hverfastöðvarnar milli klukkan hálfellefu og þrjú vanti þá salt eða sand. Hverfastöðvarnar sem verða opnar eru við Njarðargötu, við Flókagötu, í Jafnaseli og við Stórhöfða.

Reykjavíkurborg er í viðbragðsstöðu vegna asahláku næstu daga. Vel hefur gengið að hreinsa frá niðurföllum og bakvaktir eru vel mannaðar fyrir helgina. Starfsmenn Reykjavíkurborgar og verktaka á hennar vegum í vetrarþjónustu eru í viðbragðsstöðu um helgina. Símaver Reykjavíkurborgar verður opið á laugardag kl. 10:30 - 15:00 til að taka á móti ábendingum frá íbúum og koma þeim í réttan farveg.

Snjóruðningstrukkarnir tíu sem eru venjulega í því verkefni að dreifa salti á stofnbrautir og helstu umferðaræðar voru sendir út í morgun til að sanda götur.