12.700 atvinnulausir

Tæplega 12.700 einstaklingar voru atvinnulausir í lok desember 2011. Alls fjölgaði atvinnulausum um rúmlega 400 að meðaltali frá því í nóvember eða um 0,2 prósentustig.

Atvinnuleysi hér á landi náði hámarki í febrúar og mars 2010 þegar 9,3 prósent landsmanna voru án vinnu eða um 16.800 manns í lok mánaðar.

Atvinnuleysi minnkar yfirleitt á sumrin vegna afleysingastarfa en eykst síðan aftur á vetrarmánuðunum og myndar því árstíðarsveiflu. Á síðasta ári fór atvinnuleysið mest í 8,6 prósent eða um 16.500 einstaklinga. Sveiflan minnkar því markvisst milli ára og virðist sveiflan nú ætla að vera um prósenti minni en fyrir ári síðan.

Þá telur Vinnumálastofnun að árstíðarbreytingin verði minni og atvinnuleysi muni ekki aukast eins mikið milli desember og janúar og verið hefur.

Þá munu flestir þeirra rúmlega 900 einstaklinga sem tóku þátt í verkefninu „Nám er vinnandi vegur" flestir halda áfram námi eftir áramót og fara því af atvinnuleysisskrá sem og þeir einstaklingar sem hafa verið með minnkað starfshlutfall fá ekki lengur bætur samhliða hlutastarfi.

Því er talið að atvinnuleysi muni lítið breytast í janúar og verða áfram rúm 7 prósent.