Endurskoða lög um vopn, sprengiefni og skotelda

Innanríkisráðuneytið hefur nú til umsagnar drög að frumvarpi að nýjum lögum um vopn, sprengiefni og skotelda. Reynslan af gildandi lögum hefur ekki verið að öllu leyti góð en af þeim hefur hlotist nokkur óvissa og ágreiningur samkvæmt upplýsingum sem finna má á vef ráðuneytisins.

Þar segir að markmið með frumvarpinu sé að gera löggjöfina um þetta efni skýrari og því er frumvarpstextinn nokkuð ítarlegur. Þá er leitast við að auka öryggi samfélagsins með því að auka heimildir lögreglu til að leggja hald á skotvopn, sprengiefni og flugelda sem og að afturkalla leyfi. Skotvopn og sprengiefni eru hættuleg og almenningur verður að geta treyst því að óhæfir einstaklingar fái ekki leyfi samkvæmt frumvarpinu.

Meðal breytinga sem finna má í frumvarpinu er að sjálfvirk og hálfsjálfvirk skotvopn, að undanskildum hálfsjálfvirkum eða handhlöðnum fjölskota haglabyssum með skothylkjahólfum fyrir aðeins tvö skothylki, verða með öllu bönnuð. Þá verður hámarksfjöldi skotvopna í eigu einstaklings 20 vopn.

Unnt er að senda athugasemdir við frumvarpsdrögin á netfangið postur@irr.is til 30. janúar nk. Hægt er að nálgast drögin hér.