Útdeila sandi og salti til borgarbúa í hálku

Hálkan og ófærðin tekur á taugar íbúa höfuðborgarsvæðisins og sveitarfélögin fá á sig skæðadrífu gagnrýni. Borgarstjóri segir ekkert til sparað. Í Reykjavík fær fólk sand og salt á hverfastöðvum. Salta á allar götur í Kópavogi í vikunni.

Íbúar á höfuðborgarsvæðinu eru margir orðnir langþreyttir á ófærð og hálku og gagnrýna yfirvöld fyrir að standa slælega að hreinsun gatna og gangstíga.

„Ég get fullvissað borgarbúa um að við erum að gera okkar besta til að greiða úr ástandinu og það er ekki verið að spara neitt í þeim efnum,“ segir í yfirlýsingu sem Jón Gnarr borgarstjóri sendi frá sér í gær.

Þeir sem vilja taka til hendinni á eigin lóðum og innkeyrslum geta sótt bæði sand og salt í pokum á fimm hverfisstöðvum Reykjavíkur. Í stöðinni á Miklatúni fengust þær upplýsingar að talsvert væri um að borgarbúar nýttu sér þessa þjónustu. Þar var einn starfsmaður sem mokaði salt og sandi í poka fyrir þá sem vildu. Í Hafnarfirði geta íbúar fengið sand í þjónustumiðstöð í Norðurhellu. Þar hefur verið unnið að því að hálkuverja götur og stíga og hefla klaka þar sem ástandið er verst. Þessari vinnu er haldið áfram.

Jón benti á að gatnakerfið í Reykjavík sé 950 kílómetrar að lengd. Sagði hann öllum hugsanlegum ráðum beitt til að hálkuverja og ryðja götur í borginni. „Við þessar aðstæður vil ég biðja fólk að sýna ástandinu skilning, fara varlega og hætta sér ekki út nema vel búið. Þá vil ég biðja bíleigendur að hliðra til fyrir snjóruðningstækjum og sýna tillitssemi í umferðinni,“ sagði borgarstjóri.

Unnið var frá klukkan fjögur í fyrrinótt við snjóhreinsun og hálkuvarnir í samræmi við forgangsröðun að því er sagði í tilkynningu frá borginni. Notaðir voru ellefu vegheflar til að ná niður klakahryggjum í Bústaðahverfi, Heimum, Vogum, Sundum, Seláshverfi, Breiðholti, Vesturbænum, Smáíbúðahverfi og Háaleiti. Þá voru göngustígar hreinsaðir og sandur borinn í þá og í aðkomuleiðir að biðstöðvum strætó.

Í Kópavogi var unnið að því í gær að salta götur bæjarins og stefnt að því að sem flestar götur verði saltaðar í vikunni að því er sagði í tilkynningu frá Örnu Schram, upplýsingafulltrúa bæjarins. „Áfram verður unnið við snjóhreinsun í Kópavogi en notast hefur verið við hátt í tuttugu snjóruðningstæki af ýmsum stærðum og gerðum,“ sagði í tilkynningunni.gar@frettabladid.is