Hellisheiði lokuð en unnið að mokstri í Þrengslum

Hellisheiði er enn lokuð vegna veðurs og ófærðar en búið er að opna fyrir umferð á Sandskeiði og unnið að mokstri í Þrengslum en þar er þæfingsfærð og stórhríð. Á Suðurlandi er annars víðast hvar þæfingsfærð ásamt éljagang og skafrenning er færð farin að spillast.

Þetta kemur fram í tilkynningu frá Vegagerðinni. Hálka og éljagangur er á Reykjanesbraut og á Reykjanesi. Þæfingsfærð og éljagangur er á Suðurstrandavegi.

Þungfært, þæfingsfærð, éljagangur og skafrenningur er víðast á Vesturlandi. Þæfingsfærð og skafrenningur er á milli Hvalfjarðaganga og Borgarnes. Á Snæfellsnesi er þungfært og þæfingur á flestum leiðum. Ófært er á Fróðárheiði og þungfært og stórhríð á Vatnaleið. Þungfært og stórhríð er um Holtavörðuheiði, ófært á Laxárdalsheiði og í Borgarfirði og þungfært á Bröttubrekku.

Á Vestfjörðum er ófært á Klettshálsi, Kleifaheiði og Hálfdán og Mikladal og þar er einnig óveður. Þungfært og skafrenningur er í Ísafjarðardjúpi á Steingrímsfjarðarheiði og Þröskuldum. Þæfingsfærð og óveður er á milli Ísafjarðar og Þingeyrar sem og í Önundar- og Súgandafirði.

Á Norðurlandi er hálka ásamt skafrenning eða éljum nokkuð víða. Flughált er sumstaðar á útvegum. Ófært og stórhríð er á Vatnsskarði og Þæfingsfærð á Þverárfjalli. Ófært er á Öxnadalsheiði og Hófaskarði. Þæfingsfærð er í Ljósavatnsskarði.

Það er hált á Austurlandi og flughált nokkuð víða á útvegum. Á Suðausturlandi er einnig hált en þæfingur á útvegum. Ófært er í Jökuldal.