Opnar nýjan vef um ferðamennsku

Fyrirtækið Já opnar nýjan vef sem ætlað er að veita erlendum ferðamönnum betra aðgengi að upplýsingum um Ísland og vörur og þjónustu sem þeim standa til boða hér á landi.

Vefurinn, sem verður á slóðinni iceland.ja.is er samstarfsverkefni Já og aðila í íslenskri ferðaþjónustu, og verða íslensk fyrirtæki sýnilegri ferðamönnum bæði áður en þeir koma til landsins og á meðan á dvöl þeirra stendur. Öll þau fyrirtæki sem þegar eru skráð hjá Já verða sjálfkrafa skráð á hinn nýja vef þeim að kostnaðarlausu.

Nýi vefurinn verður opnaður við hátíðlega athöfn í Listasafni Reykjavíkur í dag klukkan fimm að viðstöddum fulltrúum helstu ferðaþjónustufyrirtækja og annarra gesta.

Frímann Gunnarsson, heimsborgari, lífskúnstner, mannvinur og sjónvarpsmaður, opnar vefinn formlega og afhendir „Frímanninn" - verðlaun sem hann stendur sjálfur að og eru að sögn veitt fyrir góða eftirfylgni við þá miklu landkynningu sem hann hefur sjálfur staðið fyrir á undanförnum árum, eins og fram kemur í tilkynningu frá Ja.is.