Nokkrir klukkutímar þar til álið storknar

Starfsmenn Norðuráls eru í miklu kappi við tímann eftir að rafmagnslaust varð í álverinu á Grundartanga. Nú er búið að vera rafmagnslaust í tvo og hálfan klukkutíma - en samkvæmt upplýsingum frá Norðuráli er talið að ekki megi vera rafmagnslaust lengur en þrjá til fjóra klukkutíma.

Ef rafmagnið kemst ekki aftur á bráðlega, gæti orðið milljarðatjón í álverinu. Þar sem fljótandi álið storknar í öllum leiðslum og tækjum. Bæði álið og tækin gætu skemmst við það. Það er þó ekki alveg á hreinu hversu langan tíma álverið getur verið án rafmagns, menn miða þó við fjóra klukkutíma.

Eldur kom upp í spennistöð Landsnets í Hvalfirði í kvöld með þeim afleiðingum að rafmagnið fór af álverinu og af Hellisheiðavirkjun. Búið er að slökkva eldinn, og vinna starfsmenn nú að viðgerð því tíminn er naumur.

Rafmagn á suðvesturhorninu hefur verið á detta út, og til að mynda er slökkt á mörgum umferðarljósum í Reykjavík. Þá hafa ljósastaurar einnig dottið út. Þá er einnig rafmagnslaust í Hvalfjarðargöngunum og hefur þeim verið lokað. Einnig er Hellisheiðin lokuð.

Eins og áður segir, vinna starfsmenn nú að því að koma rafmagni á álverið. Ef það gerist ekki á næstu klukkutímum gæti tjónið hlaupið á milljörðum, samkvæmt upplýsingum frá Norðuráli.