Þrjátíu hundsbit í borginni á síðasta ári

Þrjátíu hundsbit voru tilkynnt til lögreglu höfuðborgarsvæðisins á síðasta ári og að minnsta kosti fjórir hundar voru aflífaðir í kjölfarið. Um helmingur hundaeigenda í Reykjavík hafa sótt einhvers konar hlýðninámskeið.

Alloft undanfarin misseri hafa fregnir borist af fólki sem bitið hefur verið af hundum, í sumum tilvikum hefur litlu mátt muna að illa færi. Þannig var sex ára stúlka bitin í jólaboði um hátíðarnar en að sögn foreldra hennar læstist ein tönn í efri skolti hundsins inn í augntóft stúlkunnar.

Árný Sigurðardóttir, framkvæmdastjóri Heilbrigðiseftirlits Reykjavíkur, segir um 2500 hunda skráða í Reykjavík, þar af hafi um helmingur eiganda sótt einhvers konar hlýðninámskeið og fær þá afslátt af gjöldum. En framkvæmdastjóri Hundaræktarfélags Íslands og nokkrir félagsmenn hafa lýst því yfir í fréttum okkar að rétt sé að skylda tilvonandi hundaeigendur til að sækja slík námskeið.

Að sögn upplýsingafulltrúa lögreglu höfuðborgarsvæðisins voru þrjátíu hundsbit tilkynnt á síðasta ári og eru þau af ýmsum toga. Að minnsta kosti 3 bréfberar og einn sorphirðumaður voru bitnir við vinnu sína, flestir voru bitnir utandyra, á göngustígum og víðar. Einn var bitinn í fingur í gegnum bréfalúgu þegar hann var að dreifa miðum í hús. Lögreglan hefur ekki upplýsingar um hvort einhver þeirra sem bitinn var hafi orðið fyrir varanlegum skaða. Í flestum tilvikum fer sá sem bitinn var fram á að hundaeigandinn greiði lækniskostnað og flestum málunum er fallist á það og málunum lokið með sátt.

Skrýtnasta tilvikið er þó líklega þegar maður kom á síðasta ári og kærði annan mann fyrir að sparka í hundinn hans. Hinn meinti sparkari kom síðan og kærði hundinn fyrir bit. Ekki beinlínis orð gegn orði, segir upplýsingafulltrúin, meira kannski orð gegn gelti. Og örðugt fyrir lögreglu að skera úr slíkum ágreiningi.