Verulega dregur úr brottflutningi Íslendinga frá landinu

Brottfluttir íslenskir ríkisborgarar umfram aðflutta voru 15 á fjórða ársfjórðungi í fyrra. Er þetta mun minna en mælst hefur undanfarna fjórðunga. Á sama fjórðungi árið 2010 fluttu t.d. 140 fleiri íslenskir ríkisborgarar frá landinu en til þess.

Þetta kemur fram í Morgunkorni greiningar Íslandsbanka. Þar segir að brottfluttir umfram aðfluttra voru mun færri á fjórða ársfjórðungi í fyrra en á sama ársfjórðungi árið 2010. Fluttust 70 fleiri frá landinu en til þess á fjórðungnum samanborið við 440 á sama fjórðungi 2010.

Allt árið í fyrra kemur einnig betur út en árið 2010 hvað þetta varðar, en 1.465 fleiri fluttust frá landinu í fyrra en til þess í samanburði við 2.134 árið 2010 og 4.835 árið 2009. Er líklegt að hagfelld efnahagsþróun hér á landi undanfarin misseri hafi hér talsvert að segja og þá sérstaklega að bati hefur orðið á vinnumarkaði með fjölgun starfa og fækkun atvinnulausra.

Breytingin milli ára er til komin vegna þess að færri fluttust frá landinu á fjórða ársfjórðungi í ár en á sama tíma 2010 þ.e. 620 samanborið við 750 á fjórða ársfjórðungi 2010. Ef litið er til alls síðastliðins árs þá fluttu 1.335 fleiri íslenskir ríkisborgarar frá landinu en til þess samanborið við 1.650 árinu áður. Þarna er því nokkur fækkun einnig sem kann að endurspegla bætt efnahags- og atvinnuástand.