Ákærur í Straumsvíkurmálinu

Ríkissaksóknari hefur gefið út ákærur á hendur sex karlmönnum sem allir eru sakaðir um fíkniefnabrot á síðasta ári. Á meðal þeirra ákærðu eru mennirnir tveir sem taldir eru hafa lagt á ráðin um að smygla stórfelldu magni af fíkniefnum um borð í skipi sem kom frá Rotterdam til Straumsvíkur. Annar maðurinn hefur setið í gæsluvarðhaldi síðan en hinn hefur hafið afplánun vegna annars máls.

Lagði lögreglan hald á tæp tíu kíló af amfetamíni, rúmlega átta þúsund töflur af MDMA og mikið magn stera.

Annar maður er ákærður fyrir að hafa komið að sterainnflutningnum.

Þá er einn þeirra sem talinn er hafa staðið að smyglinu í Straumsvík ákærður ásamt öðrum manni fyrir að hafa haft um 250 grömm af amfetamíni og lítilræði af hassi undir höndum sem lögregla fann við húsleit.

Um fleiri smærri mál er að ræða sem öll tengjast á einhvern hátt innbyrðis.