Linnulaus áróður gegn ríkisstjórninni

Forsætisráðherra segir Samtök atvinnulífsins halda uppi linnulausum áróðri og rangfærslum gegn ríkisstjórninni og verkum hennar, sem sé ekki í þágu almennings. Formaður Sjálfstæðisflokksins segir stéttarfélögin vilja losna við ríkisstjórnina vegna svikinna loforða.

Alþingi kom saman til fyrsta fundar eftir jólaleyfi í dag. Jóhanna Sigurðardóttir forsætisráðherra flutti munnlega skýrslu um störf og stefnu ríkisstjórnarinnar. Í ræðu sinni fór hún hörðum orðum um Samtök atvinnulífsins.

„Sú spurning er áleitin hvaða tilgangi og hvaða hagsmuni það þjónar hjá Samtökum atvinnulífsins að halda uppi linnulausum áróðri og rangfærlsum gegn ríkisstjórninni og verkum hennar," sagði Jóhanna á Alþingi í dag.

Samtök atvinnulífsins gagnrýndu ríkisstjórnina harðlega í síðustu viku. Sögðu raunverulegt tilefni til að taka upp kjarasamninga frá því síðasta vor þar sem ríkisstjórnin hafi staðið sig illa í að standa við fyrirheit í yfirlýsingu í tengslum við samningana. Þannig hafi hún aðeins staðið við 24 atriði af 36 eða í tveimur þriðju hluta tilvika.

„Staðreyndirnar tala einfaldlega sínu máli. Af þeim 44 atriðum sem tiltekin eru á síðu ríkistjórnarinnar hafa 24 þegar verið uppfyllt og 19 eru í góðum farvegi."

Bjarni Benediktsson formaður Sjálfstæðisflokksins sagði fleiri en Samtök atvinnulífsins vilja losna við ríkisstjórnina. Hann sagði að nákvæmlega sami tónn væri frá ASÍ og einstökum stéttarfélögum. Þau vilji losna við ríkisstjórnina vegna svikinna loforða.