158 manns í farbanni hér síðan árið 2007

Alls hafa 158 einstaklingar verið úrskurðaðir í farbann hér á landi síðan árið 2007. Af þeim voru 59 árið 2008 og nú eru 10 manns undir eftirliti hjá flugstöðvardeild lögreglunnar á Suðurnesjum: níu karlar og ein kona. Sakborningarnir sem nú er fylgst með eru frá Litháen, Póllandi, Íslandi og Palestínu.

Á undanförnum árum hefur tveimur einstaklingum í farbanni tekist að komast út framhjá eftirlitinu. Í báðum tilfellum var um tæknilegar orsakir að ræða, eða bilun í eftirlitsbúnaði í flugstöð Leifs Eiríkssonar. Síðara tilvikið var fyrr í þessum mánuði þegar manni frá Litháen tókst að komast úr landi eftir að hafa hlotið tíu mánaða dóm fyrir fíkniefnabrot. Ekki fengust frekari upplýsingar frá lögreglunni um hvers kyns bilun varð til að mennirnir sluppu úr landi, en búið sé að ráða bót á vandanum.

Sigríður Björk Guðjónsdóttir, lögreglustjóri á Suðurnesjum, segir mikilvægt að hafa í huga að á meginlandi Evrópu er eðli máls samkvæmt auðvelt að brjóta gegn farbannsúrskurði. „Hér á landi búum við þó að því að hafa einar megindyr að landinu, Flugstöð Leifs Eiríkssonar,“ segir hún. „Þessi staðreynd gerir farbannsúrræðið á Íslandi árangursríkara en ella.“

Lögreglan getur leitast eftir farbannsúrskurði yfir sakborningi hjá dómara ef talið er að hann muni reyna að komast úr landi til að leynast eða koma sér með öðrum hætti undan málsókn eða fullnustu refsingar. Þau brot sem hafa verið framin þurfa að varða fangelsisrefsingu, það er að segja teljast ekki til minni háttar brota. Tilgangurinn með farbanni er að tryggja nærveru sakbornings sem sætir lögreglurannsókn, á yfir höfði sér málsókn eða bíður afplánunar. Þetta getur einnig átt við um menn sem erlend yfirvöld hafa óskað eftir að verði framseldir. Samkvæmt lögreglunni á Suðurnesjum er farbannsúrræðið mikilvægara eftir því sem tengsl sakbornings við útlönd eru meiri.

„Farbönn sem skráð hafa verið hjá flugstöðvardeild hafa gilt minnst í þrjár vikur,“ segir Sigríður. Með endurteknum úrskurði dómara um framlengingu farbanna getur heildargildistími farbanna orðið meiri en eitt ár.

sunna@frettabladid.is